ସୁଜାତା ହାତୀ
ଦେଖିଥା'ନ୍ତି ସେହି ସ୍ବପ୍ନ
ଯେଉଁ ସ୍ବପ୍ନ ଦିନେ ଭାଙ୍ଗି ଦେଇଯାଏ
ବାପା ମାଆଙ୍କର ମନ ।
ମାଆ କହୁଥାଏ ଶଣ୍ଠଣା ସବୁକୁ
ହେଜି ଥିବୁ ତୋର ମନେ
ବାପା କିନ୍ତୁ କୁହେ ମୋ' ଜୀବନ ଧନ
ଛାଡି ଚାଲିଯିବ ଦିନେ ।
ଜନମ ଦିନରୁ ବିଦା କଲା ଯାଏଁ
ଗୋଟି ଗୋଟି କରି ଚିଜ
ଗଢି ଦେଇଥା'ନ୍ତି ସବୁ ବାପା ମା'
ଝିଅର ସଂସାର ସଜ ।
ଝିଅ ଆଖି ତଳେ ଲୋତକ ଦେଖିଲେ
କାନ୍ଦିଥା'ନ୍ତି ବାପା ମାଆ
ହେଲେ ବିଦା ବେଳେ ସେହି ବାପା ମା'
କୁହନ୍ତି ମାଆଲୋ ଯାଆ ।
ଲେଉଟା ଚକୁଳି ଖୁଏଇ ମାଆଟି
କଇଁ କଇଁ ହୋଇ କାନ୍ଦେ
ହେଲେ ବାପା କାନ୍ଦେ ଗାମୁଛା ଭିତରେ
ଲୁହରେ ସେଇଟି ଭେଦେ ।
ଭଉଣୀ ସକେଇ ହଉଥାଏ ବସି
ଘରର କୋଣରେ ବସି
ହେଲେ ଭାଇ କାନ୍ଦେ ବୁକୁ ଫଟା କାନ୍ଦ
ଭଉଣୀ ପାଖକୁ ଆସି ।
ମନର କଥାକୁ କହିବ କାହାକୁ
ଝିଅଟିଏ ବସି ଭାବେ
ବେଶି ଭାଳି ହେବ ପୁନେଇ ପରବ
ପାଖେଇ ଆସିବ ଯେବେ ।
ବିଦା ସମୟରେ ଝିଅ ଭାବୁଥାଏ
ବିତି ଥିବା ବର୍ଷ ମାସ
ଅତି ମର୍ମାହତ ସତେ ସେହି ବେଳ
ଝିଅ ବିଦା ଶେଷ ଦୃଶ୍ୟ ।
ଭଦ୍ରକ
No comments:
Post a Comment
ହୃଦୟରୁ ଧନ୍ୟବାଦ ଏବଂ ଶୁଭ କାମନା।