ରାଜା ଖାଏ , ମନ୍ତ୍ରୀ ଖାଏ ଦେଶ ଭାସି ଯାଏ

ଦୁର୍ଗାପଦ ସାହୁ 

ଗରିବ ଜନତା ଏଠି ଗରିବ ହେଉଛି

ଧନୀ ଧନ ବଢୁ ଥାଏ ,

ଯୋଜନା ଉପରେ ପୁଣି ଯୋଜନା ଆସୁଛି

ଯୋଗ୍ୟ ବ୍ୟକ୍ତି ଚାହିଁ ରହେ ।

ରାଜା ଖାଏ , ମନ୍ତ୍ରୀ ଖାଏ ଦେଶ ଭାସି ଯାଏ...

ନଳକୂଅରେ ଏଠି ପାଣି ଆସେ ନାହିଁ

ମଦ କିନ୍ତୁ ମିଳି ଯାଏ ,

ଚାଷ  ଜମି  ସବୁ  ପଡିଆ  ପକେଇ

ଗାଁ ପୁଅଟା ବିଦେଶ ଯାଏ ।

ରାଜା ଖାଏ , ମନ୍ତ୍ରୀ ଖାଏ ଦେଶ ଭାସି ଯାଏ...

ବଜାର ଦର ପୁଣି ଭାରି ମହରଗ

ଆମ ଚାଷୀଟା ପଖାଳ ଖାଏ ,

ଇନ୍ଦିରା ଆବାସ ରାସନ୍ କାର୍ଡ୍‌ ପାଇଁ

ନିଶ୍ଚେ ଲାଞ୍ଚ ଦରକାର ହୁଏ ।

ରାଜା ଖାଏ , ମନ୍ତ୍ରୀ ଖାଏ ଦେଶ ଭାସି ଯାଏ...

ନିର୍ବାଚନ ଆସିଲେ ନେତାଟାଏ ଆସି

ଖାଲି ମିଛ ପ୍ରତିଶୃତି ଦିଏ ,

ନିରୀହ ଜନତାକୁ ଧନ ଲୋଭ ଦେଖେଇ

ଭୋଟ୍‌ ତା'ର କିଣି ନିଏ ।

ରାଜା ଖାଏ , ମନ୍ତ୍ରୀ ଖାଏ ଦେଶ ଭାସି ଯାଏ...

ଯୁବ ନେତା ଆସି ମିଠା ପ୍ରତିଶୃତି

ଆମ ଗାଁ ଦାଣ୍ଡେ ଦିଏ ,

ଏଥର ଜିତିଲେ ଆମ ଏ ରାଇଜ

ରାମ ରାଜ୍ୟ ହେବ କୁହେ ।

ରାଜା ଖାଏ , ମନ୍ତ୍ରୀ ଖାଏ ଦେଶ ଭାସି ଯାଏ...

ଜିତିଗଲା ପରେ ସେ ରାମ କେମିତି

ଲଙ୍କା ରାବଣ ପରିକା ହୁଏ ,

ସୀତା ମାନେ ଖାଲି ହରଣ ହୁଅନ୍ତି

ଏ ଦୁନିଆ ନୀରବ ଥାଏ ।

ରାଜା ଖାଏ , ମନ୍ତ୍ରୀ ଖାଏ ଦେଶ ଭାସି ଯାଏ...

ସରକାରୀ ଧନେ ଯିବ ସେ ବିଦେଶ

ନୂଆ ନେତାଟା ଚାହିଁକି ଥାଏ ,

ଥରଟେ ସୁଯୋଗ ପାଇଲା ମାତ୍ରେ ସେ

ସାତ ପୁରୁଷ ପାଇଁ ଥୁଏ ।

ରାଜା ଖାଏ , ମନ୍ତ୍ରୀ ଖାଏ ଦେଶ ଭାସି ଯାଏ...

ପାଠ ପଢି ପୁଅ ବେକାର ବସିଛି

ବାପା ଠାରୁ ଖରଚ ନିଏ ,

ଶହ ଶହ ପଦବୀ ଖାଲି ପଡ଼ିଅଛି

ଏଠି ନିଯୁକ୍ତି ଦଉଛି କିଏ ?

ରାଜା ଖାଏ , ମନ୍ତ୍ରୀ ଖାଏ ଦେଶ ଭାସି ଯାଏ...

ଉଠ ହେ ଜନତା ଗଡିଲାଣି ବେଳ

ଦେଖ ଦେଶ ଭାସି ଯାଏ ,

ରକ୍ଷକ ଆଜି ପରା ଭକ୍ଷକ ସାଜିଛି

ଏଠି ବାଡ଼ଟା ଫସଲ ଖାଏ ।

ରାଜା ଖାଏ , ମନ୍ତ୍ରୀ ଖାଏ ଦେଶ ଭାସି ଯାଏ..

 

    ମୈତ୍ରତ୍ରିଲୋଚନପୁର , ଲେଣ୍ଡୁ , ନିରାକାରପୁର , ପୁରୀ,

                         ପିନ୍ - ୭୫୨୦୧୯

ଜୟ ସାହିତ୍ୟ, ଜୟ ସମାଜ