ଉଦୟ ଭାନୁ

ରୋହିତ ସେଠୀ,ଶିକ୍ଷକ

(ଛନ୍ଦ-ଚୋଖି)

ପ୍ରତ୍ୟୁଷ ପ୍ରକୃତି ଶୋଭା    ଉଦୟ ଭାନୁର ଆଭା

        ମୁରୁଜ ବୁଣଇ ଧରା ବକ୍ଷ ଦେଶରେ

ପୂରୁବ ଆକାଶ ରାଗ     ମନେ ଜାଗେ ଅନୁରାଗ ,

       ଦୃଶ୍ୟ ଦରଶନେ ଜନ ପରାଣ ହରେ ,

               ସକଳ ଶକ୍ତିର ଆଧାର

      ସୃଷ୍ଟିର ନିୟମେ ବନ୍ଧା ସେ ଦିନକର ।୧।

ତଡ଼ାଗେ କମଳ ଦଳ     ଉତ୍ସୁକେ ଭାବ-ବିହ୍ଵଳ

      ଚାତକିନୀ ସମ ଭାନୁ ଦେବଙ୍କ ଆଶେ

ସ୍ଵର୍ଣ୍ଣିମ କିରଣ ପାଇ  ପାଖୁଡ଼ା ଦେବେ ମେଲାଇ

     ପୀୟୂଷ ପାନ କରିବେ ହୋଇ ହରଷେ ,

              ଅଭିଳାଷ ପୂରଣ ପରେ

    ସୌରଭ ବିଞ୍ଚିବେ ସର୍ବେ ଚତୁଃର୍ଦ୍ଦିଗରେ ।୨।

କୋମଳ ପ୍ରକାଶ ରାଶି   ସାଦରେ ଦିଅ ପରଶି

       ସ୍ଥାବର ଜଙ୍ଗମ କୀଟ ତବ ପ୍ରଭାରେ

ସୁଧା-ସଂଜୀବନୀ ପାଇ   ନିର୍ବିଘ୍ନରେ ଛ'ନ୍ତି ରହି

        ଅହର୍ନିଶ ବିଚରନ୍ତି ଆନନ୍ଦ ଭରେ ,

             ଉଦୟ ଭାନୁର କରରେ

    ରୋଗ-ଶୋକ ଚାଲିଯାଏ ନିମିଷକରେ ।୩।

ସହସ୍ରାଂଶୁ ମହାଦ୍ୟୁତି-    କାଶ୍ୟପ ନନ୍ଦନ ମତି

     ଏକରଥେ ସପ୍ତଅଶ୍ଵେ ବିରାଜମାନ

ରଜନୀ ପାହିଲା କ୍ଷଣି      ବସୁନ୍ଧରା ମଥାମଣି

     ଧରଣୀ ବୁକୁରେ କର ଶୁଭାଗମନ ,

           କଳୁଷ କଳଙ୍କ ବିଧ୍ଵଂସି

     ତୁମ୍ଭଲାଗି ବିଶ୍ଵବାସୀ ଲଭନ୍ତି ଖୁସି ।୪।

ସ୍ନାନାଦି କରମ ପରେ      ଉଦକ ଧରି ହସ୍ତରେ

    ଭକ୍ତି-ଅର୍ଘ୍ୟ ଅରପୁଛି ତୁମ୍ଭ ପୟରେ

ଆୟୁଷ କାମନା କରି    ସୁଖ-ଶାନ୍ତି ହୃଦେ ବରି

     ତର୍ପଣ କରୁଛି ପୁଣି ଶୁଦ୍ଧ ଭାବରେ ,

         ପ୍ରାଚୀମୂଳେ ହୋଇ ଉଦୟ

     ଜଗତ ନିମନ୍ତେ ହୁଅ ମଙ୍ଗଳମୟ  ।୫।

ଦୁତିମେଣ୍ଡି, ଖଜୁରୀପଡ଼ା,କନ୍ଧମାଳ

ସଂପର୍କ-୭୭୩୫୨୧୪୩୭୯

ଜୟ ସାହିତ୍ୟ, ଜୟ ସମାଜ