ଅମୃତ ସନ୍ତାନ

ମୋନାଲିସା ପ୍ରିୟଦର୍ଶିନୀ ନନ୍ଦ

            (ଶିକ୍ଷୟିତ୍ରୀ)

ତୁ ମଣିଷ ଜୀବନ ପାଇଛୁ ବୋଲି

              ଶ୍ରେଷ୍ଠରେ ହେଉଛୁ ଗଣା

ପଞ୍ଚଭୂତରେ ଯେ ଗଢ଼ା ତୋ' ଶରୀର

                ବୁଦ୍ଧି ଯେ ଜଗତ ଜିଣା ||

ଖଞ୍ଜି ଦେଲେ ପ୍ରଭୁ ହସ୍ତ , ପଦ , ମୁଣ୍ଡ

                           ଉଚ୍ଚମାନର ମସ୍ତିଷ୍କ

ସବୁ ପ୍ରାଣୀ ଠାରୁ ଭିନ୍ନ ଅଟୁ ତୁହି 

                   ଦେଇ ପୁଣି ସୁଖ ଦୁଃଖ ||

ତୁ ଚାହିଁଲେ ପୃଥିବୀ ହେଵ ଯେ ସୁନା

                ଜାତି ଭେଦ ଯିବ ଉଭାଇ

ଛୁଆଁ ଅଛୁଆଁ ଧର୍ମ ଭେଦ ଯେତେ

                କିଛି ତ ରହିବ ନାହିଁ ||

ପ୍ରଭୁ ଦତ୍ତ ଦାନ ଉପଯୋଗ କଲେ

          ଜୀବନ  ହେବ ସାର୍ଥକ

ଏସବୁକୁ ଯଦି ବେଖାତିର କଲୁ

           ଝୁରିବୁ ଜୀବନଯାକ ||

ତୁ ଚାହିଁଲେ ସବୁ ସମ୍ଭବ ହେବ

            କଥାଟି ନିରାଟ ସତ୍ୟ 

ଅସୀମ ଶକ୍ତି ତୋ' ଭିତରେ ନିହିତ

              କରିଦେ ତୁ ଉଦ୍ଜୀବିତ ||

ରକ୍ତ ମାଂସରେ ଗଢ଼ା ଶରୀରକୁ 

                 ଜାଣି ଜାଣି ନଷ୍ଟ କରୁ

ବିଷକୁ ଅମୃତ ଭାବିକି ପିଉଚୁ

                  ଆୟୁଷକୁ କାହିଁ ସାରୁ ||

ଯୁଦ୍ଧ ବିଭୀଷିକା ବନ୍ଦ କରିଦିଅ 

                  ଭାତୃତ୍ୱ ଭାବକୁ ଆଣି

ଭାଇଚାରା ନୀତି ଆପଣାଇ ସର୍ବେ

                  ପୃଥିବୀକୁ ଯିବା ଜିଣି ||

ବସୁଦେବକୁଟୁମ୍ବ ନୀତି ଗଢିବା

                  ସଭିଙ୍କ ହୃଦୟେ ଯାଇ

ହିଂସା , ଦ୍ୱେଷ , ଇର୍ଷା ଭୁଲିବା ସଭିଏଁ

                      ଆମେ ତ ଭଉଣୀ ଭାଇ ||

ଅମୃତ ସନ୍ତାନ ବୋଲାଉଛୁ ତୁହି

                 ପ୍ରାଣୀଙ୍କ ଭିତରେ ଶ୍ରେଷ୍ଠ

ତୋ' ପାଖରେ ଅଛି ଦୈବୀକ ଶକ୍ତି

                      କର ନାହିଁ ତାକୁ ନଷ୍ଟ ||

ବେଦପୁର , ବାଙ୍କୀ , କଟକ

ଜୟ ସାହିତ୍ୟ, ଜୟ ସମାଜ