ଆମ ନିର୍ବାଚନ ଆମ ହାତରେ

ଉଷଶ୍ରୀ ଜେନା

ଆମରି ପାଇଁକି , ଆମ ମାନଙ୍କର

ଆମରି ଦ୍ଵାରା ଶାସନ ,
ପରୋକ୍ଷ ହେଉକି ପ୍ରତ୍ୟେକ୍ଷରେ ଆମେ
କରୁଛେ ନିଜକୁ ଶାସନ ।

ନିଜେ ଘର ଢ଼ିଙ୍କି ହୋଇକି ଆମେ କି
ସାଜିବା ନିଜେ କୁମ୍ଭୀର ,
ବାଡ଼ ଏଠି ଖାଏ କ୍ଷେତକୁ ନିତି
ପ୍ରଭୋ ହେ ! ଉଦ୍ଧାର କର ।

ଚିକେନ , ମଟନେ ଲୋଭ ଅଛି ଯେବେ
ଦାବିକରି  ଆମେ ଖାଇବା ,
ମାତ୍ର ଟିପଚିହ୍ନ ଦେଲା ବେଳେ ଆମେ
ଉଚିତ ପ୍ରାଥୀଙ୍କୁ ଦବା ।
ଯେଉଁ ଗାନ୍ଧୀଙ୍କର ଅହିଂସା ନୀତିରେ

ଇଂରେଜ ହେଲା ପରାସ୍ତ ,
ସେ ଗାନ୍ଧୀ ମୁଣ୍ଡକୁ ଦେଖିକରି ଆମେ
ହିଂସାକୁ କରେ ସ୍ବାଗତ ।

ମାଙ୍କଡ ହାତରେ ଶାଳଗ୍ରାମ ଦେଇ
ମୁଣ୍ଡ କାହିଁକି ପିଟିବା?
ଫୁଟାଣିଆ ନେତା ଙ୍କ ବାହସ୍ପୋଟରେ
କାଇଁ ବିଶ୍ୱାସ କରିବା ?

ଭୋଟ ମାଗିବାକୁ ଆସିଲା ବେଳକୁ
ଖାଇବେ ଆମରି ଭାତ ,
କାମ ପାଇ ତାଙ୍କ ପାଖକୁ ଗଲେ ସେ
ମାରିବେ ପେଟକୁ ନାତ ।

ଭୋଟ ସରିଗଲେ ଆମେ ଯେ ବିରାଡ଼ି

ନେତାଏ ହେବେ ମର୍କଟ ,
ପାଞ୍ଚବର୍ଷ କାଳ ପିଠା ଭାଗ ହେବ
ନହେବା ପାଇ ନିଅଣ୍ଟ !

ଶିକ୍ଷିତ ହୋଇଛେ ଆମେ ପରା ଆଜି
ସୁନ୍ଦର ଦେଶଟେ ପାଇ  ,
ଅଶିକ୍ଷିତ , ଅପାଣ୍ଡବ ନେତାଙ୍କୁ ଯେ
କାହିଁକି ମାନିବା ସାଇଁ ?

ପ୍ରୋପଗଣ୍ଡାରେ ଭରସା ରଖିକି ଯେ

କା' ପରେ କରିବା ରୋଷ ?
ଅସରପା ପରେ କାଣି ବିଲେଇ ଯେହ୍ନେ
ଗଣତନ୍ତ୍ରକୁ ଦେବା ଦୋଷ ।  

ଖୋର୍ଦ୍ଧା - ଭୁବନେଶ୍ୱର 

ଜୟ ସାହିତ୍ୟ, ଜୟ ସମାଜ