ଜ୍ଯୋତ୍ସ୍ନା ପୃଷ୍ଟି
କାଉ ତ କଳା କୋଇଲି କଳା ,
କଳା କଜଳପାତି ।
କଳାରେ କଳା କଳା ଭଅଁର ,
କଳା ନିପୁଣେ ମାତି ।।(୧)
କଳା ଭୂଇଁରେ କଳାକୁ ମାଠି ,
କଳା ହୋଇଲା ଗୀତି ।
କଳା ସଂସାର ସତେ ମଧୁର ,
କଳାକାରର ସ୍ଥିତି ।।(୨)
କଳା ନାଲିରେ ରଙ୍ଗା କାଇଁଚ ,
କଳା ପୂଜାରୀ ପ୍ରୀତି ।
କଳା ଠାକୁର କଳି ଯୁଗରେ ,
କଳାରେ ନେଲେ ଜିତି ।।(୩)
କଳା ବଉଦ କଳା ବଳରେ ,
କଳ କୁଶଳେ ନିତି ।
କଳା ଅନ୍ଧାର ଆକାଶେ ଛାଇ ,
କଳା ଛାନ୍ଦଇ ରାତି ।।(୪)
କଳା କେବଳ କଳା ଯେ ନୁହେଁ ,
କଳା କୋମଳମତି ।
କଳା କୌତୁକ କସ୍ତୁରୀ ବିଞ୍ଚା ,
କଳା ପ୍ରତିଷ୍ଠା ପ୍ରତି ।।(୫) କଳା କଠିନ କଳା ପ୍ରାଙ୍ଗଣେ ,
କଳା ନିଖୁଣ ବ୍ରତୀ ।
କଳା କଲମ କଳା ପରଖେ ,
କଳା ଭଉଁରୀ ଜ୍ୟୋତି ।।(୬)
କଳା କମଳ କାରଣ କରି ,
କଳା କାନ୍ତରେ ଗତି ।
କଳା ଜଗାଏ କାଳରେ ପୂଣ୍ୟ ,
କଳାର ନାହିଁ ଇତି ।।(୭)
No comments:
Post a Comment
ହୃଦୟରୁ ଧନ୍ୟବାଦ ଏବଂ ଶୁଭ କାମନା।