କୈଳାସଚନ୍ଦ୍ର ପାଢୀ
ତୁମରି ଗାଁର ନୀଳ ଝରଣାରେ
ଦେହ ଧୋଇଥିଲି ଦିନେ,
ସେଇ କଥା ଆଜି ବାରବାର ମୋର
ପଡି ଯାଉଅଛି ମନେ ।
ସେଇ ଝରଣାରୁ ତୋଳି ଆଣିଥିଲି
ପଦୁଅଁ କୋରକ ଗୋଟେ,
ଆଜି ବି ସେ ସ୍ମୃତି ସାଇତା ଅଛିଗୋ
ଏଇ ମୋ ହୃଦୟ ଘଟେ ।
ତୁମରି ଗାଁର ନୀଳ ଆକାଶରେ
ଜହ୍ନର ସୁନେଲି ଛବି,
ଲେଖନୀ ଧରାଇ ହାତରେ ମୋହର
ସଜାଇ ଥିଲାଗୋ କବି ।
ଆଜି ଯେତେବେଳେ ଲେଖନୀ ଧରେ ମୁଁ
ମନେପଡେ ତୁମ ଗାଆଁ,
ମନେପଡିଯାଏ କିଶୋରୀ ବଧୂର
ନରମ ହାତର ଛୁଆଁ ।
ସେ ପୁଲକ ରାଜି ସ୍ମୃତି ହୋଇ ଆଜି
ରହିଚି ହୃଦୟ କୋଣେ,
ଚପଳ ଛନ୍ଦାର ମନେ ଥିବକି ନା
ବିହି ଏକା ସିନା ଜାଣେ ।
ତା ଆଖିର ସେଇ ନିରବ ସଂକେତ
ଓଠର ମଧୁର ହାସ,
ବେଳ ଅବେଳରେ ମନେପଡିଗଲେ
ଜୀବନଟା ଲାଗେ ବିଷ ।
କୁମାରପୁର
ଭଦ୍ରକ
ଜୟ ସାହିତ୍ୟ, ଜୟ ସମାଜ
No comments:
Post a Comment
ହୃଦୟରୁ ଧନ୍ୟବାଦ ଏବଂ ଶୁଭ କାମନା।