ଶେଷ ସୀମା

  ଶ୍ରୀ ଅଲେଖ ଚନ୍ଦ୍ର ସେଠୀ 

ଜୀବନରେ ବହୁ ବିଦ୍ଯା ସାଧିଲି

ଅର୍ଜିଲି ବହୁ ଧନ

ତଥାପି କାହିଁକି ଶାନ୍ତି ନମିଳେ

କହିଲି ମନକୁ ମନ । ୧

ଅର୍ଜିବାର କିଆଁ ପ୍ରାନ୍ତ ବିନ୍ଦୁରେ

ପହଞ୍ଚି ପାରିନି ମୁହିଁ ?

ବିବେକ କହିଲା ସୀମା ତା' ନାହିଁ

ଜଳିବା ଯାଏଁ ଜୁଇ । ୨

ପଢ଼ି ପଢ଼ି ବିଦ୍ଯା ଅର୍ଜି ଅର୍ଜି ଧନ

ତୃଷା ମେଣ୍ଟିବ ନାହିଁ 

ତୃଷା ମେଣ୍ଟିଲେ ଶାନ୍ତି ମିଳନ୍ତା

ଶୁଣ୍‌ରେ ମନୁଆ ଭାଇ । 

ଚଣ୍ଡାଶୋକ ଯେ ଭାବୁଥିଲେ ତାଙ୍କ 

ଯୁଦ୍ଧର ଅନ୍ତ ନାହିଁ 

ସାରା ପୃଥିବୀ ଜିଣିବାକୁ ହେବ

ସୁଖ ଶୟନ କାହିଁ ? ୪

ଦେଖୁ ଦେଖୁ ମହା- ରକ୍ତପାତର

ପଡ଼ିଲା ପୂର୍ଣ୍ଣଚ୍ଛେଦ 

କଳିଙ୍ଗ ଯୁଦ୍ଧ - ଯଜ୍ଞେ ନିରେଖି

ଇନ୍ଧନେ ନରମେଧ । ୫

ପାଷାଣ ହୃଦୟ ତରଳି ତାଙ୍କର 

ବହିଲା ପ୍ରେମଧାର

ସାରା ପୃଥ୍ବୀର ଜନ - ପ୍ରାଣୀ ତାଙ୍କୁ

ଲାଗିଲେ ଆପଣାର । ୬

ପ୍ରେମର ଅଢ଼େଇ ଅକ୍ଷର ଯା'ର

ହୃଦରେ ଘାରି ହେଲା

ଜାଣିବ ସେ ହିଁ ବିଶ୍ବ ଯାକର

ସବୁକିଛି ଜାଣିନେଲା । ୭

ପ୍ରେମରସ ଯେ' କରିଛି ପାନ

ମେଣ୍ଟିଛି ତୃଷା ତା'ର 

ପ୍ରେମର ଜଳେ ବୁଡ଼ିଛି ଯିଏ

ଜ୍ଞାନ ତା' ଶୁଦ୍ଧ ସାର । ୮

ପ୍ରେମ ହିଁ ଜ୍ଞାନ ପ୍ରେମ ହିଁ ଧନ

ପ୍ରେମୀ ହିଁ ଜ୍ଞାନୀ ଧନୀ

ସବୁ ଅର୍ଜନର ଶେଷ ସୀମାଟି

ପ୍ରେମ-ପିୟୂଷ ଖଣି ।୯

ଗାନ୍ଧୀ - ଗୋପବନ୍ଧୁ - ଶ୍ରୀରାମକୃଷ୍ଣ

ଶ୍ରୀମା' - ଚୈତନ୍ୟ ଆଦି

ଜଗତେ ଅମର ବିଶ୍ବପ୍ରେମର

ମହାଧନ ସମ୍ପାଦି । ୧୦

ବେଗନା , ସାହାରାପଡ଼ା , କେନ୍ଦୁଝର 

  ୭୫୮୦୧୬

ଫୋ- ୮୭୬୩୧୪୨୫୪୨                

ଜୟ ସାହିତ୍ୟ, ଜୟ ସମାଜ