ମନର ମାନସାଙ୍କରେ ତୁମେ ମାନସୀ କନ୍ୟା ପ୍ରେମର ପ୍ରତିଶୃତିରେ ତୁମେ ପ୍ରୀତିର ବନ୍ୟା
କଳ୍ପନାର କଳ୍ପବଟରେ ତୁମେ ମୁକ୍ତିର କୈବଲ୍ୟ
ଭାବନାର ଭବ୍ୟ ଉଆସରେ ତୁମେ ପ୍ରେମର ପ୍ରାବଲ୍ୟ
ଆଖିର ଅଲକ୍ଷ୍ୟରେ ତୁମେ ଆଖିଏ ସପନ
ଛାତିର ମଧୁଶାଳାରେ ତୁମେ ମଧୁର ସ୍ପନ୍ଦନ
ରାତିର ନିଷିଦ୍ଧ ପ୍ରହରେ ତୁମେ ବିଶୁଦ୍ଧ ଚୁମ୍ବନ
ନିସଙ୍ଗତାର ନଈ କୂଳରେ
ତୁମେ ଏକ ଦେହଛୁଆଁ ପବନ
ଶୂନ୍ୟତାର ସ୍ଵର୍ଗଦ୍ଵାରରେ
ତୁମେ ଏକ ଆକାଂକ୍ଷୀତ ଜୀବନ
ସମୟର କବାଟ କୋଣରେ
ତୁମେ ଏକ ଅସଞ୍ଜତ ଇଚ୍ଛା
ସାମାଜର ଚାରିଛକରେ
ତୁମେ ଏକ ମନାକରା ରାସ୍ତା
ମୋ ଅଭଦ୍ରପଣର ତୁମେ ଏକ ଗୋପନ ଡାଏରୀ
ମୋ ଅବୁଝା କଲମର ତୁମେ ଏକ ଅସରା ସାୟେରୀ
ଜୀବନର ଦୁର୍ଗମ ପଥରେ ତୁମେ ଏକ ସୁଗମ ସଙ୍ଗୀତ
ସମ୍ପର୍କର ବେଳାଭୂମିରେ ତୁମେ ଏକ ଜହ୍ନରାତି ଗୀତ
ନିଃଶବ୍ଦତାର ଫୁଲଶେଯରେ
ତୁମେ ଏକ ଅନ୍ତରଙ୍ଗ ଆଳାପ
ଶବ୍ଦର ମିଠା ଗହଳିରେ
ତୁମେ ମୋର ପୁଣ୍ଯର ସଂଳାପ....
ଜୟ ସାହିତ୍ୟ, ଜୟ ସମାଜ
No comments:
Post a Comment
ହୃଦୟରୁ ଧନ୍ୟବାଦ ଏବଂ ଶୁଭ କାମନା।