ଭାରତୀ ରଥ
ମୋ କୋଳରେ ଆସି ଶୋଇବାକୁ ତୋତେ କିଏ ସେ ଦେଲାରେ ଅନୁମତି ?
କରୁଣ ସ୍ୱରରେ ଖୋଜୁଛି ତୋ ମା'
ଗଡ଼ାଉଛି ଲୁହ ଦିନ ରାତି.
ସୀମାରେ ପହରା ଦେବା ପାଇଁ ସିଏ
ପଠାଇ ଥିଲା ଯେ ତୋତେ
ଉଠିଯା' ଧନରେ ନିଦ ଭାଙ୍ଗି ଏବେ
ଅପନିନ୍ଦା ହେବ ମୋତେ.
ଶୋଇବାର ବେଳ ନୁହେଁ ଏ ବାପ ରେ
ଆତଙ୍କବାଦ ଯେ ଉଠେ ମାତି
କେମିତି ସହିବେ ଦେଶବାସୀ ତୋର
ଘୋଟି ଆସେ ଆଜି ଅମାରାତି.
ଲଢ଼ିବା ପାଇଁ ତୁ ଜନମିଛୁ ପରା
ପଛଘୁଞ୍ଚା ନାହିଁ ତୋ ଜାତକେ
ଇଟାର ଜବାବ ପଥରେ ଦେବାକୁ
ଆଜି ଏ ଭାରତ ମା' ଡାକେ
ଛାତିକୁ ଫୁଲାଇ ଏବେ ବି ବୁଲନ୍ତି
ଦେଶଦ୍ରୋହୀ ବିଭୀଷଣ
ଏ ଘୋର ବିପଦେ ଶୋଇକି ପାରିବୁ
ସାଜି ତୁ କାଠ ପାଷାଣ ?
ବୀର ପୁଙ୍ଗବ ତୁ ଲଢ଼ିବା ତୋ ଧର୍ମ
ଗୁଳି ତୁ ସହିବୁ ଛାତି ପାତି
ରୋକି ପାରିବନି ତୋତେ ପରା କେବେ
ଏ ଦେଶର ହୀନ ରାଜନୀତି.
ବାଟ ଭୁଲି ଚାଲି ଆସିଛୁ ଭାବି ମୁଁ
ମୋ କୋଳରେ ସିନା ଦେଲି ଆଶ୍ରୟ
ଅମୃତ ସନ୍ତାନ ଚିର ଅମର ତୁ
ଏ ନୁହେଁ ତୋହର ଚିର ବିଦାୟ
No comments:
Post a Comment
ହୃଦୟରୁ ଧନ୍ୟବାଦ ଏବଂ ଶୁଭ କାମନା।