ମନୋରମା ହାତୀ
ତମେ ଯିବା ପରେ ପରେ
ମୁଁ ଏବେ ପୂରାପୂରି
ବେଫିକର ବେପରୱା ଭାବେ
ଜୀବନ ଜୀଉଁଛି
ଆଉ ଘରର ଦରଜା
ଆଉଜା ହେଇ ରହୁନି
ତମ ଆଗମନର ଆଶାରେ
ଝରକା ଖୋଲୁନି
ଜହ୍ନକୁ ଦେଖି ଦେଖି
ତୁମ କଥା ଭାବିବା ପାଇଁ
ନା କୋଉ କବିତାର ଶବ୍ଦକୋଷ
ଓଲଟାଉଛି "ତମେ"ର
ପ୍ରତିଶବ୍ଦଟେ ପାଇବା ଆଶାରେ
ନା ଅଛି ତମ
ରାଗ ଅଭିମାନର ଗଣିତ
ଯାହାର ସମାଧାନ ପାଇଁ
ମୋତେ ତ୍ରିକୋଣମିତିର
ସୂତ୍ର ଠାରୁ ଆହୁରି ସହଜ ଉପାୟଟେଖୋଜି ବାହାର କରିବାର ଆଶଙ୍କା
ଖାଇ ଯାଉଥିବ ଭିତରେ ଭିତରେ
ତମ ସହ ବିତିଥିବା ମୁହୂର୍ତ୍ତର
ସ୍ମୃତିକୁ ମନେ ପକେଇ
ଆଖିର ଇଲାକାରେ ତୁମ ଛବି ବ୍ୟତୀତ
ସ୍ୱପ୍ନ ଲାଗି ନିଷିଦ୍ଧାଞ୍ଚଳ ଘୋଷଣା କରିବାର
ଆଉ ବ୍ୟସ୍ତତା ବି ନାହିଁ
ତମ ବିନା ବେସ୍ ଭଲ ଅଛି
ଖୁସିରେ ଅଛି
ତଥାପି ତମ ଶୂନ୍ୟ ସ୍ଥାନଟା
କେବେ କେମିତି ପ୍ରତିଶୋଧ ନେବା ପରି
ପବନ ସମ ପହଁରି ଯାଉଛି
ମୋ ବର୍ତ୍ତମାନର ଛାତି ପରେ
ଆଉ ସେଇ ସମୟର ସ୍ପନ୍ଦନଟା
ଯେମିତି ଅଟକି ଯାଇ କହେ
"ମୁଁ ଖାଲି ସମୟ ବିତଉଛି.....
ହେଲେ ଜୀଇଁବା କଣ ଭୁଲିଯାଇଛି।"
କହ୍ନେଇପୁର, କଟକ
୭୫୩୦୦୬
ଫୋ- ୮୯୧୭୨୭୯୦୨୩
ଜୟ ସାହିତ୍ୟ, ଜୟ ସମାଜ
No comments:
Post a Comment
ହୃଦୟରୁ ଧନ୍ୟବାଦ ଏବଂ ଶୁଭ କାମନା।