କର ଆଜି ଏହି ପଣ

ସତ୍ଯଜିତ ସ୍ବାଇଁ

ଉଠିପଡ ଆହେ ଉତ୍କଳ ନିବାସୀ                                   
କେବେଠୁ ରହିଛ ଶୋଇ
ସମୟ ସୁଅରେ ପୂରୁବ ଗୌରବ,
ଗଲାଣି କେବେଠୁ ଧୋଇ  ||

ଆଜିର ଦିନରେ ତୁମର ପଡୋଶୀ
ଗଲେଣି ଆଗକୁ ବଢ଼ି
ସଅଳ ଉଠିକି ଦୌଡିବନି ଯଦି,
ବହୁ ପଛେ ଯିବ ପଡ଼ି  ||

ପୂର୍ବପୁରୁଷଙ୍କ ସଫଳତା ଧରି
ଖାଉଅଛ ବିକି ବିକି
କେତେଦିନ ଆଉ ପଙ୍ଗୁ ସାଜିଥିବ,
ପଡ଼ୁନାହଁ କିବା ଥକି   ||


ଶସ୍ୟଶ୍ୟାମଳାରେ ପୂର୍ଣ୍ଣ ଥିଲା ଦିନେ
ତୁମ ରତ୍ନଗର୍ଭା ମାଟି
ଆଜି ତହିଁ ଶିଶୁ କୁପୋଷଣେ ମରେ,
ଦାନା ପାଏ ନାହିଁ ପାଟି  ||

ଆଜିର ଦିନରେ ନେତାମନ୍ତ୍ରୀଙ୍କର
ହୋଇଅଛ ତୁମେ ବଶ
ଅଳସୁଆମୀର ଚାଦରର ତଳେ,
ହରାଉଛ ନିଜ ଯଶ  ||

କାଲି ଯିଏ ତୁମ ବୀରତ୍ୱ ଆଗରେ
ନୁଆଇଁ ଥିଲା ତା' ମଥା
ଆଜି ତୁମେ ଏଠି ଅପାରଗ ସାଜି
ଗାଉଅଛ ତା'ର ଗାଥା  ||

ଖୋଲି ଦିଅ ନିଜ ପାଦରୁ ଶିକୁଳି
ମନ କର ପୁଣି ଦୃଢ଼
ପୂରୁବ ଗୌରବ ଫେରି ପାଇବାକୁ,
ଆଗକୁ ଆଗକୁ ବଢି  ||

ସୁନାର ଓଡ଼ିଶା ଗଢିବା ପାଇଁକି
କର ଆଜି ତୁମେ ପଣ
ଆଜି କରୁଅଛି ଏତିକି ଗୁହାରି,
କାନ ଖୋଲି ଥରେ ଶୁଣ  ||

ଅଡ଼ଶପୁର (କଟକ)
ଜୟ ସାହିତ୍ୟ, ଜୟ ସମାଜ