ଭାଇ ଭାଗ

ଯଶୋବନ୍ତ ସେଠୀ
 
  ବର୍ଷ ବର୍ଷର ଜଉମୁଦଦିଆ ସମ୍ପର୍କଟା                              
           ଦୁଇ ଭାଗ ହୋଇଗଲା
     ଅମିନର ଛାର ଚେନ୍ ଓ କଡିରେ ।

       ବଡଭାଇ ହିସାବରେ ଅବଶ୍ୟ
       ଏ ଅସମୟ ପାଟିସନ୍ ପାଇଁ
   ସମାଜ ମତେ ବେଶି ଦାୟୀ କରିବା କଥା
     ମୋ' ସ୍ତ୍ରୀକୁ ଘରଭାଙ୍ଗୀ ଆଖ୍ୟା ଦେଇ ।
               କ'ଣ କହିଲେ !
             ଘର ଭାଙ୍ଗିଗଲା !
       ହଁ   ହଁ, ଘର ଭାଙ୍ଗି ବାସଗୃହ ପାଲଟି ଗଲା ।
  ସଜନା ଗଛ , କୁନ୍ଦୁରି ଲଟା, କୁଲା,ମସିଣା,ଚଟେଇ

          ମଶା , ମାଛି , ପ୍ରଜାପତି,  ଦୁହୁଳ ଗାଈ,
               ବାପାଙ୍କ ଗାମ୍ଭୀର୍ଯ୍ୟ ,
              ବୋଉ ପଣତର ଛାଇ ,
      ଏବେ ତାର ଅଧେକୁ ମୋର ଅଧେ ।
      ବଡଭାଇ ସ୍ନେହର ପ୍ରତିବଦଳରେ (ବୋଧେ)
           ଅଧିକ ଦି'ଅଖା ଚାଉଳ ଯାଚିଥିଲା ।
               ତୁ ଛୋଟ ଛୁଆଟା
       ଦୟା କରିବାକୁ ତୋର ବୟସ ହୋଇନିରେ--
              କହି ଫେରେଇ ଦେଲି ।


            ଟୋକା ଚଣ୍ଡିଆ ସରପଞ୍ଚଟା
               ବୋଧେ ତା' ଲୋକ ।
           ସଞ୍ଜବେଳେ ଦେଶୀ ଭାଟିଆଡୁ
             ଅସମାନ୍ତରାଳ ପଦପାତରେ
             ଦୁହେଁ ଆସୁଥିବାର ଦେଖିଲି ।

       ଟୋକା ବାହା ହେଇନି ବୋଲି ଆଉ ବର୍ଷେ
          ବୋଉ ତାପାଖରେ ପଡି ରହିଲା
                  ବାହାହବା ପର୍ଯ୍ୟନ୍ତ ।
           ଏଇଲେ ବାପା ମୋ ପାଖରେ ।
       ଟୋକା ହାତକୁ ଦି'ହାତ ହେଲାପରେ
            ଉଭୟ ବାପା-ବୋଉଙ୍କ ସ୍ନେହ
            ମୋ'ଠି ପନ୍ଦର, ତା'ଠି ପନ୍ଦର ।

                     ମୁଁ ଜଣେ ଶିକ୍ଷକ ।
          କୋଉ ଉପପାଦ୍ୟ ବଳରେ ତେବେ
         ପିଲାଙ୍କୁ ପ୍ରମାଣ ଦେବି - ଏକତା ହିଁ ବଳ,
            ନିଜର ରକ୍ତ ଯୋଉଠି ଚାହୁଁଛି
            ବାପା-ବୋଉଙ୍କୁ ଦ୍ୱିଭାଗ କର !
       କୋଉ ଆଧାରରେ ପିଲାଙ୍କୁ ଶିକ୍ଷା ଦେବି
             ଦେଶକୁ ବିଭାଜନରୁ ରୋକିବାକୁ
           ଜାମ୍ମୁ-କାଶ୍ମୀର ହାଇକୋର୍ଟ କିମ୍ବା
                  ସୁପ୍ରିମ୍ କୋର୍ଟରେ ନୁହେଁ,
               ସିଧା ମିଳିତ ଜାତିସଂଘରେ
                ପିଟିସନ ଦାଏର୍ କର ! ! !

              □  ■  □  ■  □
     
      ଏ ସି ପି (ନିରାପତ୍ତା)
  ପୋଲିସ କମିଶନରେଟ୍‌, ଭୁବନେଶ୍ବର 

ଜୟ ସାହିତ୍ୟ, ଜୟ ସମାଜ