💞ଅଜବ ପ୍ରେମ💞

ଭାରତୀ ରଥ (ଶିକ୍ଷୟିତ୍ରୀ)                              ***************

ପିତା ମାତାଙ୍କୁ ଯେ ଦିନେ ପୂଜନ୍ତିନି                       
     ଦିଅନ୍ତି ନାନା କଷଣ
ଗପ, କବିତାରେ ଦେଖାଇ ହୁଅନ୍ତି
    ଶୁଣାନ୍ତି କେତେ ଭାଷଣ ।
ଜୀବନଟା ସାରା ଯେତେ ଚାହିଁଲେ ବି
    ଶୁଝେନି ଯାହାର ଋଣ
ବରଷକେ ତାଙ୍କୁ ଗୋଟିଏ ଦିବସ
    କରିଥାନ୍ତି ସମର୍ପଣ ।
ଜିଇଁ ଥିବା ବେଳେ ପେଟକୁ ନ ଦେଇ
     ଖାଇବାକୁ ଗଣ୍ଡେ ଭାତ
କ୍ଷୀରି, ପୁରୀରେ ସେ ଭସାଇ ଦିଅନ୍ତି
    ଶୁଦ୍ଧିକ୍ରିୟା ସତେ ଯାତ ।
ପିତୃଦେବ ଭବ, ମାତୃଦେବ ଭବ
     କଥାରେ କେତେ ଭକତି
ଜରାନିବାସରେ ଛାଡିଦେଲା ବେଳେ
     ଥରେନି ତାଙ୍କର ଛାତି ।
ପ୍ରତିଷ୍ଠା ଅର୍ଜନ ପାଇଁ ସେ ମନ୍ଦିରେ
    କରନ୍ତି କୋଟିଏ ଦାନ
ବାପା ମାଆ ପାଇଁ ଗୋଟିଏ ଟଙ୍କା ବି
   ହୁଅଇ ସାତ ସପନ ।
ପିତୃଦିବସରେ ବୁଢ଼ା ବାପା ପଛେ
   ଲୁଚି ପୋଛୁ ଥାଉ ଲୁହ
ଲୋକ ଦେଖାଣିଆ ଉପହାର କେତେ
   ଆଣିଥା'ନ୍ତି ବୋହୂ, ପୁଅ ।
ମାତୃଦିବସରେ ମାଆ ପାଇଁ ନୂଆ
   ଲୁଗା ଆଣିଥା'ନ୍ତି କିଣି
ଅତିଥି ଭାଙ୍ଗିଲେ ସେଇ ମାଆ ପୁଣି
  ହୋଇଯାଏ ଚାକରାଣୀ ।
ସୁଧୁରିବ କେବେ ମାନବ ସମାଜ
   ଛାଡି ବୃଥା ପ୍ରହସନ
ପିତାମାତା ପରି ଚଳନ୍ତି ଠାକୁରେ
  ଦେଇ ପ୍ରକୃତ ସମ୍ମାନ ।

ରଗଡ଼ି - ବାଙ୍କୀ - କଟକ 
ଜୟ ସାହିତ୍ୟ, ଜୟ ସମାଜ