ଘରର ଘରଣୀ ମୋ' ମାଲିକାଣୀ

ଅନୁପମା ଦାସ

ଦଶ ଦିଗପାଳ ହୋମ ସାକ୍ଷୀ ରଖି                                             ଆଣିଲି ଘରକୁ ଗୋରୀ

ଶାଢ଼ୀ ଅଳଙ୍କାରେ ଟ୍ରଙ୍କ ଭରଇ

      ପକେଟରୁ କରି ଚୋରି ।0।

ବନ୍ଧୁ ପରିଜନ ସବୁ ବିଦା କଲି

ବୁଦ୍ଧିରେ ତାହାର ପଡି

ନେଡି ଗୁଡ଼ ଏବେ କହୁଣୀରେ ଉଭା

ପଡିଛି ଦାନ୍ତ କାମୁଡି ।1।

ସଭିଙ୍କ ଆଖିରେ ନାଲି ଟୁକୁ ଟୁକୁ

ସାଧବ ବୋହୂର ଛବି

ମୁହିଁ ଏକା ଜାଣେ ମହାକାଳ ଫଳ

କୋହ ଉଠେ ଭାବି ଭାବି ।2।

ଇଉଟ୍ୟୁବ୍ ଦେଖି ବ୍ୟଞ୍ଜନ କରଇ

ଭୁଞ୍ଜଇ ମୁହିଁ ଯତନେ

ପୋଡା ଜଳା ଯଦି ଲୁଣିଆ କହିବି

ଖାଦ୍ୟ ନ ମିଳିବ ଦିନେ ।3।

କେଉଁ ଦେବତାଙ୍କ ପାଦ ଧୂଳି ସମ

ହେଇ ସିନା ପାରିନାଇଁ

ଏ ଦେବୀ ଆଗରେ ଚଣ୍ଡୀ ଚାମୁଣ୍ଡା ଯେ

ଲାଜରେ ପଡିବେ ନଇଁ ।4।

ଘର ଓଳା ଠାରୁ ବାସନ ମାଜିବା

ଆଦେଶ ଯେପରି ସାରେ

ଟିକେ ଉଣା ହେଲେ ଅଦିନିଆ ଝଡ଼

ସୁନାମି ବି ଆସିପାରେ ।5।

ଦୁନିଆ ଦାଣ୍ଡରେ ମୁଁ ସିନା ମାଲିକ

ପୋଷା କୁକୁରଠୁ ହୀନ

ଘରର ଘରଣୀ ପରା ମାଲିକାଣୀ

କାନ୍ଦି କାନ୍ଦି ବିତେ ଦିନ ।6।

ଜୟ ସାହିତ୍ୟ, ଜୟ ସମାଜ