ପାପୁର ମୋବାଇଲ ଖେଳ

ନିବେଦିତା ମହାପାତ୍ର 
~~~~~^^^^~~~~~
ପାପୁ ଆମର ଭାରି ସୁଧାର
ମୋବାଇଲରେ ତା'ର ଆଦର
ଖାଇବା ପିଇବା ଯାଏ ଭୁଲି
ଖେଳୁଥାଏ ସଦା ତାକୁ ଧରି ॥
ବୁଝେଇଲେ ବି ବୁଝେନି ଜମା
ନ ମିଳିଲେ କରେ କେତେ ଡ୍ରାମା
ପାଦ ତଳେ ପୁଣି ପଡିଯାଇ
କାନ୍ଦୁଥାଏ ସେ ବିକଳ ହୋଇ ॥
କହିଲେ ବାପା ଦିନେ ବୁଝାଇ
ମୋବାଇଲ ଛାଡ ସୁନା ହୋଇ
ବାପାଙ୍କୁ ସେ ତ ଦେଲା ବୁଝେଇ 
ତୁମ ପ୍ରଭାବ ପଡେ ମୋ' ଠେଇଁ ॥
କହି ଦେବାଟା ଭାରି ସହଜ
ହେଲେ କରିବା ଲାଗଇ କଷ୍ଟ
କହିବା ଆଗରୁ କରିବାକୁ
ଶିଖାଇଛନ୍ତି ମିସ୍ ଆମକୁ ॥
ସାହିତ୍ୟ ବହିରେ ଅଛି ଲେଖା
ଗାନ୍ଧିଜୀ ଦେଇଥିଲେ ବାରତା
କହିବା ଆଗରୁ କିଛି କାହାକୁ 
କରି ଦେଖାଇବା ଆଗେ ତାକୁ ॥
ବଡ଼ ମାନଙ୍କ କାର୍ଯ୍ୟକୁ ଦେଖି
ପିଲାମାନେ ସବୁ ଶିଖିଥା'ନ୍ତି
ତମେ ତ ଦେଖୁଛ ନିତି ନିତି
କାହିଁକି ଅବା ମୁଁ ଛାଡି ଦେବି ॥
ପାପୁ କଥାକୁ ସଭିଏଁ ଶୁଣି
ବିଚାର କରିଲେ ମନେ ପୁଣି
ଏ କଥାରେ ହେଲେ ଏକମତ
କହିବା କଥାଟି ତା'ର ସତ୍ୟ ॥

ମୁକୁନ୍ଦ ମିଶ୍ର ନଗର - ପୁରୀ 

ଜୟ ସାହିତ୍ୟ, ଜୟ ସମାଜ