*************************
ସାତ ଦିନ ରହି ମାଉସୀର ଘରେ
ଆଜି ଆସୁଅଛ ଫେରି l
ସଙ୍ଗେ ନେଲନାହିଁ ପରାଣ ପ୍ରିୟାଙ୍କୁ
ରହିଛନ୍ତି ମନ ମାରି l
ଆହେ ପ୍ରଭୁ ନୀଳଗିରି,
ଆସନ୍ତା ବର୍ଷକୁ ମା'ଙ୍କୁ ସଙ୍ଗେ ନେଇ
ଘୋଷ ଯାତ୍ରା ଯାଅ କରି l
କୋଉ କାଳୁ ତୁମେ ଚଢି ଆସୁଅଛ
ସେଇ କାଠ ଗଢା ରଥ l
ଲୋକ ଟାଣୁଛନ୍ତି ପୋଲିସ ଭିଡୁଛି
ବୋଲୁଛି ଡାହୁକ ଗୀତ l
ଆହେ ପ୍ରଭୁ ଜଗନ୍ନାଥ,
ଅଡ୍ଡି ହେଉ ଅବା ବି ଏମ୍ ଡବ୍ଲ୍ୟୁ
କାଆର କିଣ ତୁରନ୍ତ l
ତୁମକୁ ସାଆନ୍ତେ ନଚେଇ ନଚେଇ
ରଥକୁ ନିଅନ୍ତି ଟେକି l
ପାପ ନେତ୍ର ମୋର ସହି ପାରୁନାହିଁ
ତୁମ ଛେଚାକଚା ଦେଖି l
କନ୍ ଭେୟର୍ ବେଲ୍ଟ ଜୋଖି,
ସୁଇଚ୍ ଟିପିଲେ ରତନ ବେଦୀରୁ
ଯାନେ ଉଭା ଚକାଆଖି l
ଇନ୍ଦ୍ରଙ୍କ ଦୟାଲ ରୁ ବଡଦାଣ୍ଡେ ବହେ
ଦ୍ଵାପର ଯମୁନା ନଈ l
ମୋଟର ଲଅଞ୍ଚ କିଣି ପାଶେ ରଖ
ତୁମ ଜଳ ଯାତ୍ରା ପାଇଁ l
ସଂସାର ନାଉରୀ ହୋଇ,
ନିଜେ ବାହି ନେବ ଗୁଣ୍ଡିଚା ମନ୍ଦିର
ଆମେ ରହିଥିବୁ ଚାହିଁ l
ମହାପ୍ରଭୁ ଏବେ ପହଣ୍ଡି ଯାତ୍ରା ରେ
ବାଜେ ଘଣ୍ଟ ଖୋଳ ତାଳ l
କାହାଳୀ ମର୍ଦଳ ଶୁଣି ଶୁଣି କାନ
ବଥେଇ ଯାଏ ପ୍ରବଳ l
ଘେନା କର ନନ୍ଦ ବାଳ,
ଡିଜେ ବାଜା ସାଥେ ଆଲବମ ନାଚ
ଏଥର ହେଉ ପ୍ରଚଳ l
ମହାପ୍ରଭୁ ତୁମ ରତନ ଭଣ୍ଡାର
ଚାବି ତ ଯାଇଛି ହଜି l
ଡୁପ୍ଲିକେଟ ଗୋଟେ କୁଆଡୁ ମିଳିଲା
ଏତେ ଗୁଡା ଖୋଜି ଖୋଜି l
ଭଣ୍ଡାରକୁ ଖୋଲ ଆଜି,
ରତନ ଅଛି ନା ସିନ୍ଦୁକ ଭିତରେ
ବିକି ସାରିଲେଣି ପାଜି l
ଅମୃତ ମଣୋହି ରାଜା ଖଞ୍ଜା ଜମି
ବିଲ୍ଡର ନେଲେଣି ମାରି l
ନାରାୟଣୀ ସେନା କବ୍ଜା କରି ତା'କୁ
ବିକନ୍ତୁ ପ୍ଲଟିଙ୍ଗ କରି,
ପଇସା ଏକାଠି ଧରି
ବଡ ଦେଉଳ ଟା ପୁରୁଣା ହେଲାଣି
ନୂଆଟେ ତୋଳନ୍ତୁ ହରି l
ଯେତେ ଯେତେ ଯାହା ଲେଖିଲି ହେ ପ୍ରଭୁ
କରିଦେବ ବାରେ କ୍ଷମା l
ମୂର୍ଖ,ଅପଣ୍ଡିତ ଏ ବ୍ୟଙ୍ଗ ଗୋସେଇଁ
ଦୋଷ ନ ଧରିବ ଜମା l
ଶରଣ ଗଲି ମଣିମା,
ବେଳୁଁ ବେଳ ଦୁଃଖ ବଢେ ଅପ୍ରମିତ
ନାହିଁ ପୂର୍ଣ୍ଣଚ୍ଛେଦ କମା l
👏👏ଜୟ ଜଗନ୍ନାଥ ସ୍ୱାମୀ👏👏
🌷🌷ଚରଣାଶ୍ରିତ🌷🌷
🙏🙏ବ୍ଯଙ୍ଗ ଗୋସେଇଁ 🙏🙏
ଡ଼ିଆ- ନିରାକାରପୁର -ଖୋର୍ଦ୍ଧା
ଜୟ ସାହିତ୍ୟ, ଜୟ ସମାଜ
No comments:
Post a Comment
ହୃଦୟରୁ ଧନ୍ୟବାଦ ଏବଂ ଶୁଭ କାମନା।