କରୋନାଟା ହେଲା କାଳ

          ବଳରାମ ପଲାଇ 

  କରୋନା କର୍ଫ୍ଯୁ ଜାରି ହୋଇଥିଲା
                 ବାହାରେ ବୁଲିବା ମନା,
 ଗୁଗୁନା ବାବୁଲି ଘରେ ବସି ବସି
                ହେଉଥିଲେ ଆନମନା ।୧
ଗୁଗୁନା କହିଲା ବାବୁଲି ଭାଇହେ
            ବାହାରେ ବୁଲିବା ଚାଲ,
ବାବୁଲି କହିଲା ଖାକିବାଲା ମାମୁଁ
            ଭାଙ୍ଗିଦେବେ ଆମ ଗେଲ ।୨
ବାବୁଲି କାନରେ ଗୁଗୁନା ପାଖେଇ
            କିସ କଲା ଫୁସୁଫାସ,
ବାବୁଲିର ବୁଦ୍ଧି ଦ୍ବିଗୁଣ ହୋଇଲା
            ମୋଡିଦେଲା ଟିକେ ନିଶ ।୩
କୋରନା ତୁଣ୍ଡିଟା କାତୁଣ୍ଡେ ନଥିଲା
            ଘରୁ ଗଲେ ଯେ ବାହାରି,
ଗୁଗୁନା ମାରିଲା ସ୍କୁଟିକୁ ଷ୍ଟାର୍ଟ
            ଘିରିଂଗ୍ ଘିରିଂଗ୍ କରି ।୪
ଦେଖିଲେ ରାସ୍ତା ଶୂନ୍‌ଶାନ୍ ଅଛି
           ଲୋକଟିଏ ଦେଖାନାହିଁ,
ସ୍ଥାନେ ସ୍ଥାନେ ବାରିକେଟ ବନ୍ଧା ଅଛି
           ଦାରୋଗା ନଥିଲେ ତହିଁ ।୫
ମନ ଆନନ୍ଦରେ ବୁଲିଲେ ବଜାରେ
            ସ୍କୁଟି କରି ସାଇଁ ସାଇଁ,

ବୁଲୁ ବୁଲୁ ଦୁହେଁ ଅଣ୍ଡାଳି ଦେଖିଲେ
            ପକେଟେ ଗୁଟୁଖା ନାହିଁ ।୬
ବିନା ଗୁଟୁଖାରେ ବୁଲିଲେ ବଜାରେ
            ବୁଦ୍ଧି ବାଟ ଦିଶେ ନାହିଁ,
ଗୁଟୁଖା ପାଇଁକି କନ କନ ହୋଇ
            ଏପାଖ ସେପାଖ ଚାହିଁ ।୭
ଦୋକାନୀ ଗୋଟିଏ ଅଧାଖୋଲା କରି
            ଦେଖୁଅଛି ମିଟି ମିଟି,
ଜଣେ ଦୁଇଜଣ ଭିତରେ ବସିକି
            ଲଗାଇ ଅଛନ୍ତି ଖଟି ।୮
ଲମ୍ବିଛି ଗୁଟୁଖା ମାଳମାଳ ହୋଇ
            ନାନା ରକମର ସେଠି,
ବାବୁଲା ଗୁଗୁନା ବ୍ରେକ୍ ମାରିକି
            ରଖିଦେଲେ ତାଙ୍କ ସ୍କୁଟି ।୯
ମାଗିଲା ବାବୁଲା ଦୋକାନୀକୁ ଠାରି
             ଦେବକି ଗୁଟୁଖା ମାଳେ,
ପୁଲିସି ଗାଡିଟା ବୁଲୁଥିଲା କାହିଁ
             ପହଞ୍ଚିଲା ସେତେବେଳେ ।୧୦
ଦୁଇଟି ପୁଲିସି ଝପଟି ଆସିଲେ
            ହାତେ ଥିଲା ତାଙ୍କ ବାଡି,
ଗୋଡାଇ ସଭିଙ୍କୁ କାବୁ କରିନେଲେ
             ନେଇଗଲେ  ସ୍କୁଟି ଗାଡି ।୧୧
ଥାନାରେ ପୁରାଇ ନିର୍ଧୁମ୍ ଛେଚିଲେ
            ଚଉଦ ପୁରୁଷ ଶୋଧି,
କହିଲେ ବେହିପେ ବେଶି ପାଟି କଲେ
                ଲାଗିବ କାନୁନ୍ ବିଧି ।୧୨
ହାତଯୋଡି ପରା ବିନୟେ କହୁଛି
            ଆମ ମୋଦି ସରକାର,
ବିନା ମାସ୍କରେ ବାହାରେ ବୁଲୁଛ
            କରୋନାକୁ ନାହିଁ ଡର ।୧୩
ଅଧଘଣ୍ଟା ପରେ ଥାନା ବଡବାବୁ
            ଆସିଲେ ଚିହିଁକି କରି,
କରାଇଲେ ତାଙ୍କୁ ଉଠ୍ ବସ
            ଦୁଇହାତେ କାନ ଧରି ।୧୪
ହାତ ଗୋଡ ସବୁ ଦରଜେ ବିନ୍ଧିଲା
            ପିଠି ଫାଟି ହେଲା ନାଳ,
କହିଲା ଗୁଗୁନା ବାବୁଲାକୁ ଚାହିଁ
           କରୋନାଟା ହେଲା କାଳ ।୧୫

                       (ହୁମର )         
ଜୟ ସାହିତ୍ୟ, ଜୟ ସମାଜ