ବିଳାପ - କବି ହୃଦୟର

ଭାରତୀ ରଥ (ଶିକ୍ଷୟିତ୍ରୀ)
*     *    *     *   *    *    

ଏ କ'ଣ କଲି ମୁଁ ?
ସମସ୍ତେ କହନ୍ତି
 ପ୍ରତ୍ୟେକ କବି ଭିତରେ କୋଉଠି ନା କୋଉଠି
ପାଗଳାମି ଲୁଚି ରହିଥାଏ.
କିନ୍ତୁ ମୋର ଏ ପାଗଳାମି ?
କଣ ପାଇଁ ??
ଏଠି ନ ଥିଲା ତ ଜୀବନ ଯନ୍ତ୍ରଣା
ନା ଥିଲା ବଞ୍ଚିବା ପାଇଁ ସଂଘର୍ଷ.
ତେବେ କ'ଣ ପାଇଁ ବିକି ଦେଲି ମୋ' ମାନସ ସନ୍ତାନକୁ ?
ରାତି ରାତି ଉଜାଗର ରହି
ଯାହାର ଅଙ୍ଗ ସୌଷ୍ଟବକୁ ସଜାଇଥିଲି ଶବ୍ଦ ଚାତୁରୀରେ
ଲହୁ, ଲୁହ ଏକାଠି କରି
ଜୀବନ୍ତ କରିଥିଲି ମୋ' ଭାବନା ରାଜ୍ୟରେ.
ସାମାନ୍ୟ କେଇଟା ମାନପତ୍ର ଆଉ ସମ୍ବର୍ଦ୍ଧନା ଆଶାରେ
କେମିତି ଟେକି ଦେଲି ମୋ' ସନ୍ତାନକୁ
ଅଜଣା ଦଲାଲ ହାତରେ ?
ଏବେ ବି ଗୁଞ୍ଜରିତ ହୁଏ ସେ ଆର୍ତ୍ତଚିତ୍କାର -
"ଏ କ'ଣ କଲୁ ମା' ? "
ବିଳପି ଉଠେ ମୋ' କବି ହୃଦୟ
ଧିକାର କରେ ମୋ' ମାତୃତ୍ୱ.
ନା, ଆଉ ନୁହେଁ
ଏଵେ ମୁଁ ଜାଗ୍ରତ
ଉଦ୍ଧାର କରିବି ଏ କବି କୁଳକୁ
ପ୍ରତ୍ୟାଶାର ଅନ୍ତର୍ଦାହରୁ.....
ରଗଡ଼ି ,ବାଙ୍କୀ (କଟକ)
ଜୟ ସାହିତ୍ୟ, ଜୟ ସମାଜ