ଚମ୍ପୂ

ରଞ୍ଜନ କୁମାର ମହାନ୍ତି 

 ----- କ ----

   କେତେଦିନୁଁ ଲୋ ପରାଣ ସହି !
କଳିଥିଲି ମନେ    କହିବି ତ ଦିନେ 
      କରୁଣାକରଙ୍କୁ ଯାଇ...

କୁହା କଥା ମୋର     କର୍ଣ୍ଣରେ ଗୋଚର 
          କରିଲେନି ବ୍ରଜସାଇଁ
କି କରିବି ମିତ         କହ ମୋ' ଅଗ୍ରତ 
      କି ଉପାୟ ଏଥି ପାଇଁ  ..... ୧ 

କାନ୍ତ କଲେ ପର      କାନ୍ତା ଯେ କାହାର 
            କହ କହ ସଖି ତୁହି 
କଷଣକୁ ମୋର        କରିବ କି ଦୂର 
    କୃଷ୍ଣ ବିନା ଅନ୍ୟ କେହି..... ୨ 

କେଉଁ ମନ୍ତ୍ର ପଢି     କେ' କଲା ଗାରେଡି 
         କାହ୍ନୁଙ୍କୁ ନେଲା ଛଡେଇ 
କୃପା କରି ସହି        କହ ତୁ ବୁଝାଇ 
     କରିବି କି ବୁଦ୍ଧି ମୁହିଁ.....  ୩ 

କାୟା ଯେ ଅସାର    କୃଷ୍ଣ ବିନୁ ମୋର 
        କଳାକର ସେ ମୁଁ କଇଁ 
କଜ୍ଜ୍ୱଳର ଗାର         କହେ ବଂଶୀଧର 
    କୃପା ନେତ୍ରେ ଦିଅ ଚାହିଁ..... ୪

କହଇ ଅଧମ            କୃଷ୍ଣ ରାଧା ପ୍ରେମ 
          କଲମରେ ଲେଖି ନୋହି
କି ଅପୂର୍ବ ସହି           କୃଷ୍ଣ ଠାରୁ ରାଇ 
   କେତେବେଳେ ଭିନ୍ନ ନୋହି.....୫ 

🔶🔶🔶🔶🔶🔶🔶🔶🔶🔶🔶🔶🔶
   ବାଲେଶ୍ୱର 
ମୋ --8658574945
🔶🔶🔶🔶🔶🔶🔶🔶🔶🔶🔶🔶🔶

                 ଜୟ ସାହିତ୍ୟ, ଜୟ ସମାଜ